martes, 14 de octubre de 2014

Panadeiro por un día...

De seguro que non son a mellor persoa para opinar. Pero a min, a fin de contas, encantoume.

Os panadeiros pillados coas mans
na masa.
Levo anos falando con xente, recibindo e atendendo visitas. Ensinando o que facemos no noso obradoiro tanto a profesionais como a xente curiosa por este oficio. E a conclusión á que chego sempre é que o que máis gusta e impresiona é a sinceridade. Non deixa de me sorprender. Falar con sinceridade do que se fai, ensinalo con toda a franqueza e demostrar que para facer un bo pan non hai máis ciencia que a honestidade, as materias primas, o saber facer e o tempo. E repito, sigo a sorprenderme, cada día máis de que a sinceridade sexa o que máis mola de todo.

As prazas estaban esgotadas dende facía tempo. Significa que a xente si que ten un interese polo mundo do pan. En Con Moita Miga xa fomos conscientes.

E nada sen máis ciencia e complicación, o que fixemos foi aprender a facer pan. Sentirmos panadeiros por unha tarde e entrar de cheo nunha mini xornada de traballo dunha panadería. Amasamos a man e esa masa, cada “panadeiro por un día”, levouna para cocer na casa. Mentres formamos, fermentamos, cortamos, incluso empiruchamos unha masa que xa previamente amasara eu. E sen máis. Todo moi simple, moi sinxelo, moi de poder facer na casa.

O ambiente dos aromas, do tacto, de ver esas masas…  Masas dun 80% de hidratación, o menciono por que trataron masas dun 80% de hidratación (aí o deixo). E saíu pan, un pan con nome e alma de cada un deles. Os “panadeiros por un día” deixaron a súa pegada para sempre no I Obradoiro de Pan da Moa.

Integrantes do I Obradoiro Pan da Moa

Simple e sinceramente, grazas.

martes, 9 de septiembre de 2014

I Obradoiro de Pan con Guillermo Moscoso: Panadeiro por un día...

O día Sábado 4 de Outubro deste 2014 levarei a cabo un obradoiro de pan no Obradoiro Moscoso Moure, de Pan da Moa. Nel, durante unhas 4 horas de duración, e tras unha breve explicación sobre as nocións básicas da elaboración dun pan artesán nunha panadería tradicional, pasaremos polas diferentes fases do proceso de elaboración do produto: as fariñas, as masas nai, o amasado, a fermentación, o fornado e a cocción.

Suporá, tras unha breve explicación introductoria, unha vivencia e inmersión no mundo vivido día a día nunha panadería, a escala. Vai dirixido ao público amateur, aos amantes do pan que teñan ganas por coñecer e adentrarse no mundillo das masas e da fariña. Será como sentirse panadeiro por un día!


I OBRADOIRO DE PAN: PANADEIRO POR UN DÍA
PAN DA MOA
GUILLERMO MOSCOSO MOURE
SÁBADO 4 DE OUTUBRO, 17:00
Obradoiro Moscoso Moure, de Pan da Moa
Rúa do Cubelo 27, Amio (Santiago de Compostela)

Inscrición: obradoiropandamoa@gmail.com
- 12 prazas
- 50€/persoa
- Nº conta: ES44 0238 8195 6806 0010 8382 (Banco Pastor)
- Concepto: "Obradoiro Pan da Moa"
- Nome, apelidos e tlf. contacto
- enviando escaneado ou en fotografía o comprobante do ingreso bancario
[PRAZAS ESGOTADAS]
Se queres entrar coma reserva, podes enviar os teus datos e permanecerás en orde de anotación por si se da algunha baixa a última hora.

martes, 2 de septiembre de 2014

Oficio e produto...

Este blog vai para dous anos. Dous anos moi intensos cheos de vivencias e de actividade. Un blog tremendamente humilde que permitiu difundir aínda así o meu pensamento persoal sobre moitas circunstancias do mundo do pan. Ségueme a sorprender que a xente pare a ler un texto onde o único que explico é a miña maneira de ver unha realidade sempre baixo a miña perspectiva. Non deixa de sorprenderme. Incluso denoto que algo do que escribo ten relevancia ou tan sequera, considérase importante por algún no mundo da panadería. Iso sorpréndeme máis. 

Non máis lonxe da realidade hai que decatarse que pouca transcendencia pode ter, pero sumado a todo o que se fai polo pan, pois de seguro que algo pode axudar.

Un dos pequenos pasos dados no sector. Con Moita Miga
organizou, con gran asistencia de público, as primeiras
xornadas profesionais do pan galego.
Continúo a me erguer moi cedo a traballar practicamente todos os días do ano. Penso na panadería as 24 horas do día. Son o presidente da Asociación Cultural Con Moita Miga que foi a organizadora da Primeiras Xornadas do Pan Galego. Falo case a diario con panadeiros de moitos lugares para intentar mellorar o oficio e o produto. Intento axudar en formación a quen mo pide e a quen desexa realmente aprender o pouco que lle poida eu ensinar. E non sei que pasa, pero non chega.

Cando naceu este blog, en Mallorca na compañía do outro administrador do mesmo, Dani, tiña a esperanza de que máis xente de Galicia se unira ao movemento do pan, do pan artesán, do bo pan, que custara algo menos. Pero a realidade sempre pon a cada un no sitio, e percibo pouca xente nova con iniciativa e ganas de facer cada vez máis cousas. Vexo bastante xente que si que está a espera de ver que se fagan cousas pero non de facelas por si mesmos. E sen dúbida que iso é moi diferente. 

Vexo que hai veteranos no oficio que non queren deixar paso e axudar as novas xeracións. O concepto de panadería ten moito que cambiar, seguramente que se os novos non teñen os apoios da xente que máis experiencia ten, pois a tarefa aínda vai ser máis complicada do que é. 

Vexo moita ruptura no sector profesional da panadería. Descubrín, dende a organización do evento, dunha corrente enfrontada entre moitas das asociación profesionais. Moitos intereses ocultos que se escapan da mellora da panadería, e moitas envexas e posta de atrancos para quen intenta facer algo polo oficio. 

Hai xente que dende fóra da panadería pode axudar, aportar novas ideas e novas maneiras de facer as cousas. Pois temos que darlle entrada, e eles que vexan que se teñen iniciativa propia este é un sector con multitude de posibilidades. 

Sinto que a miña ollada de hoxe non sexa tan optimista coma doutras veces, sinto. Pero tantos obstáculos hai veces que cansan. Tamén saben os que me coñecen que non son dos que se resignan ou tiran a toalla. Ao contrario, déronse pasos. E tamén estou seguro que isto non acaba máis que comezar. 

Só pido que se aposte polo oficio e polo produto. E oficio e produto son dúas palabras tan potentes que deberían de incomodar a moitos con só escoitalas. 

Eu mentres tanto seguirei arreo. 

Oficio e produto.